من أجمل وأبسط وأصدق ما قرأت…إليكم هذه الكلمات المقتبسة!!

هالأرض فيها من البشر أجناس , في بشر ناس وفي بشر مش ناس!
في ناس دوم جبينها عالي , وفي ناس لازم بالقدم تنداس!
وفي ناس عقلها من الفكر خالي , بدل الفكر بعقولهن وسواس!
في ناس لازم ياكلو نخالي , وفي ناس من بين عيونها بتنباس..
في ناس عم يمشو متل آلي , شكلها حلو جواتها تنك ونحاس!
في ناس معدنن غالي , وعندن أصل أغلى من الألماس..
في ناس قضو العمر بطالي , كانوا على خزنه فاضي حراس!
في ناس هودي بيشغلو بالي , عندن جسم لكن ما عندن راس!!
في ناس فوق الخيل خيالي , قلبن بقلب المعركه متراس..
في ناس للأسرار طبالي , بيحكو حكايا بتحبس الأنفاس!
في ناس للأخبار نقالي , روحن أكيد مخاويه الأنجاس!
في ناس لو سهروا مع الوالي , عندن وزن بالجوهر بينقاس..
في ناس عقلن كومة زبالي , مالن دوا إلا عصا الكناس!!
في ناس خلقو عالدني عاله , في ناس عبو من الدهب أكياس..
هيدي البشر عندن ألف حالي , عندن وفا وبقلوبن إحساس..
في ناس للأخلاق ميالي , في بشر ناس وفي بشر مش ناس!!

أزهار أبو الخير- شعبان. عكا
مُقتبس