وصل موقع عكانت بيان صادر عن شركة فندق سينما بستان م.ض ووزع في مدينة عكا ونشر على صفحات الفيس بوك اليوم ونحن ننشره تماما كما وصل مراسلنا …..
أسئلة وأجوبة عن قضية فندق سينما بستان :
– يا مستثمر مين انت بالضبط, ويمكن انت وراك يهود؟
انا عربي فلسطيني، أجيت البي نداء القيادات العربية واهالي عكا لاستثمر في هذه المدينة الصامدة قبل ما تضيع كلها من ايدينا وتروح لاوري بوري من نهريا وايلي ساعدون من تل ابيب، وايلان كافييه من القدس وغيرو وغيرو وغيرو…! ويا خيا, يعني المستثمر اليهودي بحاجة ليكون متخبي؟ كل اليهود الي بيشترو في عكا ما كانو متخبيين…واشتروا عشرات البيوت والمساكن بدون لا اعتراض ولا حتى بيانات او استنكار او أي احتجاج. اما لما اجا العربي .. سبحان مغير الاحوال, كل الناس صارت وطنيه وهو صار خاين وسمسار!!!
– طيب شو ومن مين اشتريت ؟
يا خيا …انا اشتريت من الدولة، وللتدقيق استرجعت لايدي عربية، اكثر من 2 دونم على سور البلد, اللي معروف باسم سينما بستان.
– طيب شو المشروع؟
بحسب شروط المناقصة وحسب الخريطة الهيكلية للمنطقة، ممنوع ابني شقق او بيوت سكنية وانا ملزم ابني فندق فقط. وللتفاصيل كلها عن الخارطة الهيكلية والمناقصة في موقع الانترنت
رابط للمناقصه:
– طيب ليش اشتريت في عكا ؟
لانه عكا عمتنباع للمتمولين اليهود، وما بدنا يصير فيها مثل يافا ولانه بدنا الارض ترجع لاصحابها الاصليين ولانه لما بتبني مشروع وبيشتغل فيه العكاوية, بيزيد صمودهم, مثل ما بيقول المثل : "مطرح ما بترزق الزق".
– طيب شو مع ام احمد زيدان؟
احنا كلنا ام احمد, وكلنا مندافع عنها…واحنا ضد الاخلاء لام احمد او لاي عربي في عكا, ومفروض الكل يعرف ان الاخلاء هو من قبل شركة التطوير وما بيتعلق فينا وحتى لو تنازلنا عن المناقصة كليا، الاخلاء مستمر والارض رح ترجع للدولة علشان تنشر مناقصة جديدة او تعطيها لواحد من المستثمرين اليهود اللي شاركوا في المناقصة ومن بينهم شخص اسمه ايلي ساعدون من تل ابيب (على فكرة هو واحد من اصحاب البازار التركي وبيوت في حارة القلعة وعقارات اضافية في حارات مختلفة).
– طيب والحل ؟
يا عكاوية اعتبروا انه ملكي هو ملككم …هل كنتم انتم بترجعوا السور والسينما للدولة؟! هاي هي الوطنية؟! هذا هو النضال؟! هذا هو التمسك بالارض؟! هيك منمنع التهويد؟! ….. الله اكبر وحسبي الله ونعم الوكيل
والله شاهد على ما اقول 4/5/2014
شركة فندق سينما بستان م.ض
