الوَصِيّة…
يا إمي لملمي جراحي..
وانفخي عالوجع تيروح..
يا إمي عم تختفي ملامحي!
وصوتي صار مبحوح..
يا إمي طبطبي علي,
بركي القبر بيحن شوي,
إقريلي قرآن وادعيلي..
وحطي فوقي ورد بفوح..
يا إمي ما تنسي,
مرتي الصبية..
وبنتي الصغيرة..
وأختي وخي..
صبريهن يا إمي,
عفراقي هديهن,
وأعطيهن منك إيمان,
مكلل بكوم الحنية!!
يا إمي ضمي (هيام) وقوليلا,
أنا إلها مشتاق..
وبوسيها ووصليلا,
إنو صعب الفراق,
ما شبعت منها ولا فرحت في,
بس طمنيها إنو هي,
كانت بالنسبة إلي أحلى أمنية..
واتحققت قبل ما يكون الفراق!!
يا إمي سلمي عالكل..
هاي هي الوصية!
وقوليلن شادي ببعتلكوا تحية,
وطمنيهن أنا مرتاح,
وحضن ربي إلي أغلى هدية.
بقلم: أزهار أبو الخير- شعبان. عكا.
